Psalms 10

1Kungani, Oh Thixo, umela khatshana?
Kungani uzifihla ngezikhathi zokuhlupheka?
2Ngobuqholo bakhe umuntu omubi uzingela ababuthakathaka,
abayengeka ngamacebo awakhayo.
3Uzikhukhumeza ngezinkanuko zenhliziyo yakhe;
ubusisa abayizihwaba athuke uThixo.
4Ngenxa yokuzigqaja kwakhe omubi kamdingi uThixo;
kuyo yonke imicabango yakhe akulandawo kaNkulunkulu.
5Izindlela zakhe ziyaphumelela;
uyadelela njalo lemithetho yakho ikhatshana laye
aneme lapho ebona izitha zakhe.
6Uthi, “Akulalutho olungangixukuxa;
ukuthokoza ngokwami lanini,
angiyikufa ngahlupheka.”

7Umlomo wakhe ugcwele amanga lenhlamba lezithuko;
ulimi lwakhe luqukethe uhlupho lobubi.
8Ucathama ngaphandle kwemizi;
avumbuluke lapho abulale abantu abamsulwa,
ahlale ecatheme ekusithekeni.
9Uyacathama njengesilwane ekusithekeni;
ucathamela labo abangelamandla;
uyabadumela abahudulele emambuleni akhe.
10Ababambileyo uyabachoboza baphangalale;
uyabawisa ngamandla akhe.
11Uzitshela athi, “UNkulunkulu usekhohliwe;
uyabugubuzela ubuso bakhe angabe esabona.”

12Vuka, Thixo! Phakamisa isandla sakho,
Oh Nkulunkulu. Ungabakhohlwa abazihluphekelayo.
13Kungani umuntu omubi ethuka uNkulunkulu na?
Kungani na ezitshela esithi,
“Kazukungithonisisa?”
14Kodwa wena, Oh Nkulunkulu, uyalubona uhlupho losizi;
uyakunanzelela ukuze ulamule.
Ongelamandla uzilahla kuwe;
wena ungumsizi wezintandane.
15Yephula ingalo yomuntu oxhwalileyo;
mthonisise ngokuganga kwakhe
obekuzahlala kungaziwa.

16 UThixo ungumbusi kuze kube nini lanini;
izizwe zizabhubha elizweni lakhe.
17Uyazizwa, Oh Thixo, izifiso zabancindezelweyo;
uyabaqinisa, ulalele ukukhala kwabo,
18ulamulele izintandane labancindezelweyo,
ukuze kuthi umuntu, ongowasemhlabeni,
angabe esesabeka futhi.